متن نوحه ترکی کربلا

تعارض کفر و ایمان در کربلا

كربلاده بیر تعارض كفر و ایمان ایلدی

بو تعارض معنی ایمانی اعلان ایلدی

ظاهراً گرچه ایكی لشكر مقابل دوردولار

باطناً امّا مقابل حقّ و باطل دوردولار

روبرو كفر تمام و دین كامل دوردولار

اهل نیران قصد قتل اهل رضوان ایلدی

چكدی صف بیر سمتیده انصار شاهنشاه دین

یعنی یتمیش بیر نفر جاندان گیچن اهل یقین

بیر طرفده لشكر كفّاریدی هشتاد مین

بو ایكی صف بو تناسب كونی حیران ایلدی

ایستدی بنیان دینی اهل كفر ایتسون خراب

قتلف عام اولسون او چولده اهل ایمان شیخ و شاب

خطّ بطلان ایستدی كفره چكه اهل كتاب

بو خطه قانی مركّب كلكی پیكان ایلدی

باطله بیر خطّ بطلان چكدی الحق اهل حق

اولدی ظاهر باطن جاءالحق و باطل زهق

بیله فتحین شكرینه حق اهلی هر كس بیر طبق

قرمزی گل تك بدن تقدیم جانان ایلدی

بو قزل گللر دولیدی گرچه خار تیریله

برگ برگ اوراقیدی هر تك تكی شمشیریله

لیك لطف یاره باخ آلدی نه چوخ تقدیریله

دوندروب هر برگی بیر سولماز گلستان ایلدی

بو گلستاندا آچان هر برگ گل پیرایه سی

اولدی قرآنون یازیلمیش قانیله بیر آیه سی

دهریده بو آیه لردی اصل قرآن مایه سی

حشره تك بو آیه لر تثبیت قرآن ایلدی

مكتب قرآنیدن هر بیر آلان تصدیقینی

خوش گوروب اعمالینون آیاتیله تطبیقینی

قانیله ایتدی موشّح نائسه تشویقینی

جان و مالین شوقیله قرآنه قربان ایلدی

چوخ بیر عالی مدرسه طفّ ایچره تاسیس ایتدیلر

درس اسلامیّتی دنیایه تدریس ایتدیلر

قولاً و فعلاً مرام دینی تقدیس ایتدیلر

دین بو تقدیس اهلینه تقدیر شایان ایلدی

موبمو شرح ایتدیلر اسلام تعلیماتینی

ویردیلر اعمالیله هر نكته توضیحاتینی

اَلْحَقُ یُعْلُوا وَ لا یُعْلا عَلَیْه اثباتینی

صفحه ی خاكه كتابت هر آخان قان ایلدی

ویردیلر آزاده لیق سرمشقینی هر بیر كسه

اگمسون باش دهریده هر مرد اولان كس ناكسه

عالمه بولدوردولر هر قدر باد ظلم اسه

قامت مردی گورنمز اگدی چوگان ایلدی

آز جماعت دشمنه نه باش اگوب نه قاچدیلار

عین مغلوبیّت ایچره جاده ی فتح آچدیلار

سینیه هر بیر یارادن بیر قزل گل ساچدیلار

هر بیرین قان آغلیان هر یاره خندان ایلدی

هر علاقه فكرینی دنیاده باشدان آتدیلار

شوقیله ترویج اسلام اوسته قانه باتدیلار

اهل اسلامی اویالدوب اوزلری خوش یاتدیلار

بیله خدمت دینه یتمیش بیر مسلمان ایلدی

دیده ی حق بینیله گوردی او یتمیش بیر نفر

كاخ ظلم آل سفیانی یخانماز خشك و تر

سیل خون ایستر بیله قصری ایده زیر و زبر

هر كس اوز قان چشمه سی زخمین فراوان ایلدی

قاتدیلار قان چشمه لردن بیر بیره سیل ایتدیلر

اصغرین قانیله هر بیر نقصی تكمیل ایتدیلر

ووردولار بیداد كاخین خاكه تبدیل ایتدیلر

سیله باخ هر كاخ ظلمی سست بنیان ایلدی

ایتدی یتمیش بیر نفر توحید اهلی اتّحاد

اتّحادیكه ویروب آموزگار دین یاد

جمعی بیر اولدی او جمعون آشنایه دوندی یاد

غبطه سین بو اتّحادین هر بیر انسان ایلدی

بو حقیقی اتّحادیله همان مردان دین

ایلیوب ایمانه تكیه اولدی پشتیبان دین

سرفراز ایتدی لوای دینی سربازان دین

سربلند هر فرد فردین ذات سبحان ایلدی

دوشدولر ایسّی قوم اوسته پاره پاره زخمدار

یاره لردن عارضه اِنّا فَتَحْنا یازدیلار

نی بویی آخِر اوجالدی راس هر خُرد و كبار

قانلی باشلار آفتاب فتحی تابان ایلدی

تا جهان وار چرخیده تابنده دور خورشید و ماه

بلكه تا وار هر قدر بو آفرینش دستگاه

اهل دینی روسفید و اهل كفری روسیاه

بو نچه یوز گوزلری قانیله الوان ایلدی

بو نچه یوز گوزلری قانیله الوان شیخ و شاب

یازدیلار جان صفحه سینده شرح دینه بیر كتاب

هر كس او قانیله یازدی همّتینجه فصل و باب

نقطه ی هر حرفیده مین نكته كتمان ایلدی

بو كتابه اوّلین قسمتده اصحاب وفا

مسلم و عون و حبیب و غیر احباب وفا

شرحه شرحه جسمیده شرح ایتدی بیر باب وفا

هر باخان بیر كلمیه مین شرح عنوان ایلدی

بو تمامه راد صیداوی یازان باب نماز

بو حقایق اوستونه قویماز سالا پرده مجاز

ای عجب بیر كلمه سوزده بیر جهان ابراز راز

فضله باخ هر حرفیده مین فصل پنهان ایلدی

بیر گویه باخدی دیدی پیغمبر اوغلی الصّلات

الصّلات ای تشنه لعلی عالمه آب حیات

ظهردور وقت فریضه عَجِّلوا قَبْلَ الوَفات

بیر دعای خیر اونا شاه شهیدان ایلدی

ایتدی فرمایش بلی سن ایلدون ذكر نماز

حق سنی اهل نماز اولماقلا ایتسون سرفراز

پرچمیم عمران ركن دینه ایلر اهتزاز

ركن دینی امّت بی دین ویران ایلدی

بوردا وار بیر نكته ی باریك شرحی معضلات

خوشدی لَمْ یُسْبَقْ و لَمْ یُلْحَق شهادت یا صلات

هر كس اوز اندازه ی فكرینجه درك ایلر نكات

شه دعاسی گرچه مشكل حلّین آسان ایلدی

لاجرم اهل حقیقت رغم هر اهل مجاز

اوز یاراسیندان آخان قانیله آلدی دستماز

قیلدی اوّل وقت آخِر عمر جمعاً بیر نماز

بو نمازی هر نمازه ركن اركان ایلدی

بونمازیكه قیلیندی خوفیله اخفاتیله

عالمی دولدوردی جهر صیت تهلیلاتیله

تا قیامت هر نماز اهلین او تكبیراتیله

وقت اوّل هر نمازه امر و فرمان ایلدی

بیر نماز خوف او گون قیلدی بیر عدّه رادمرد

تا نمازین قیلماسون خوفیله هر آزادمرد

خانه ی ایمانی جمعی خانمان بر باد مرد

تا خراب آباد وار بالمرّه عمران ایلدی

گیزلنن خورشید عزّت سایه ی شمشیرده

اهلینه گوستردی صورت سایه ی شمشیرده

جاودانی بیر شرافت سایه ی شمشیرده

كسب او گون بیر لحظه ده بو رادمردان ایلدی

یازدی باب توبه نی حرّ ریاحیّ شهید

آچدی نومید اهل عصیانه گوزل باب امید

ایلدی روی گنهكار سیاهین قان سفید

غسل توبه قانلا غرق بحر عصیان ایلدی

ووردی بیر غوطه او قان دریاده بیحد ذوقیله

نوش ایدوب شهد شهادتدن ئولونجه شوقیله

تاپدی جاویدی بقا نفسین فنایه سوقیله

بو بقادن غبطه خضر آب حیوان ایلدی

كوی عشقه ایستدی تاپسون او گمگشته سبیل

قرب عزّتده عزیز اولسون اوزون دوتدی ذلیل

صدقیله باب نجات امّته دوشدی دخیل

خاكراهی توتیای دیده ی جان ایلدی

توكدی گوزدن اشك تر، ایسلاندی خاك پای شاه

عرض ایدوب كای هاربینه ملجاء و پشت و پناه

من خطاكارم گنهگارم پشیمان روسیاه

عذرخواهم بیر گناهیم كونی پژمان ایلدی

نیلیوم چارم ندور ای چاره سیزلر چاره سی

نیلسون دنیاده بیر دنیا خطا آواره سی

ووردی بیر اود جانه آه سردیم آتش پاره سی

حدّتی خوناب چشمی آتش افشان ایلدی

ال منیم دامن سنون ای معدن رحم و كرم

گر كسیلسه اللریم دامانون الدن ویرمرم

دامنون كسسن گینه ال دامنوندن چكمرم

تا گورم شه بو دواسیز درده درمان ایلدی

اودلانوب بسكه سمندر تك شرار آهینه

ایلدی آهی اثر رحم و كرم درگاهینه

موج ووردی بحر رحمت بنده خاطرخواهینه

میزباناً رافتیله حرّی مهمان ایلدی

بیر نظرله قیلدی شه اوز خاكسارین كیمیا

دردینه محتاج درمان اولدی هر درده دوا

ایمدیده وار عرض حال ایلر اونا شاه و گدا

چوخلارین بیله تذلّل صاحب شاه ایلدی

آل هاشم هر خصوصیّتده ممتاز اولدولار

هر صفات عالیه انجام و آغاز اولدولار

كاملاً اسرار دینه كاشف راز اولدولار

باطن دینی بنی هاشم نمایان ایلدی

سبقت ایتدی آل هاشمده شبیه مصطفی

اولدی نسل آل ابراهیمدن اوّل فدا

ایلدی بیر همّتیله نصرت دین خدا

همّتین عالمده سرمشق جوانان ایلدی

ایستدی رخصت ادبله خسرو بی یاردن

عرض قیلدی كای حریم قربی دور اغیاردن

اذن ویر تا خاك پایونده نثار ثاردن

گورسون اكبر كوكب بختین فروزان ایلدی

بو منای عشقیده ای مایه ی فخر خلیل

هیچ فدایه اولماز اسماعیل تك فدیه بدیل

اولمیان قربان كویون دوشمین بو گون قتیل

هم اوزین هم هاجرین عمره پشیمان ایلدی

آلدی بو دللر شكسته دل شهنشاهین دلین

اوغلینون گوردی مخمّر دینیله اب و گلین

لیك حیف اولسون عطش دلدن سالوب شیرین دلین

گوزده بحر اشك شه موج ایتدی طوفان ایلدی

ایتدی فرمایش كه ای آرام دل نور بصر

اذن ویردیم گیت، گیدر روحیمده سن گیتسن اگر

لیك بیر لحظه قباقیمجه یری ایلوم نظر

سروناز اكبری بو سوز خرامان ایلدی

شه قباقینجه دوشوب شهزاده بیر آز ووردی گام

اوغلینون آردینجه باخدی بیر دولی گوزله امام

دوتدی یوز گوگ سمتینه عرض ایلدی كای لاینام

شاهد اول امّت بیزه ظلمینده طغیان ایلدی

بیر جوان اولدی مبارز بو گروهه ای خدا

خَلق و خُلق و منطقی آئینه ی احمد نما

كُلَّمَا شْتَقْنا عَلی خَیْرِ الْاَنامِ مصطفی

اشتیاقیم دردینه شوقیمجه درمان ایلدی

خجلتیله دوردی شهزاده چكوب دلدن بیر آه

عرض ایدوب كای آسمان عزّته خورشید و ماه

من سنون قربانوام ای فدیه ی عشق اله

چوخ خجل قربانینی الطاف سلطان ایلدی

شهریارا سیز عظیم الشّانسوز قدروز جلیل

ماسِوا ذات عزیزوز پیشگاهینده ذلیل

كسب فخر خدمتوزده صرف نقد جان قلیل

شه منی فدیه قبول ایتدی چوخ احسان ایلدی

لطف مخصوصوز ولو مخصوص عزّتدور منه

گو بو رفتاروز تقاضای محبّتدور منه

آند اولا زهرایه چوخ اسباب خجلتدور منه

اوّلین آثار خجلت عمری پایان ایلدی

لاجرم آیریلدی گوندن مین دلیله مشتری

مشتری جان نقدینه كالای قتله مشتری

مشتری آردینجا گون جاری یوزه اشك تری

چون فرات و دجله شه دامانین عمّان ایلدی

گیتدی شهزاده، دوروب تلّ اوسته شاهنشاه دین

گوردی اوغلی سخت سست ایلوب عنان مركبین

دشمن اوسته آت سالوب گویا امیرالمومنین

حمله دشمن اوستونه چون شیر یزدان ایلدی

تا یتیشدی مرکز میدانه سست ایتدی رکاب

هم لجام توسنین سخت ایتدی سبط بوتراب

بادپیما دوردی اوستونده یوزی بیر آفتاب

آب تابی چشمه ی خورشیدی سوزان ایلدی

باشلادی کفاره دعوت دینه پیغمبر کیمی

کوفیانه حجت اتمام ایلدی حیدر کیمی

توکدی دریای فصاحتدن سوزی گوهر کیمی

ارزش هر گوهری بو گوهر ارزان ایلدی

حیف او ملت بسکه غفلت باده سیندن مستیدی

پست فطرت ملته هر پند عالی پستیدی

جمله سی پابند فکر قتل و بند و بستیدی

آشیانه دللرینده بسکه شیطان ایلدی

یازدی ابواب مواساتی مواسات هیکلی

هیکلیله تربیت ویرمیشدی دامان علی

بیله نفسی ایلر دامن تربیت ایلر بلی

تربیت هر پاک نفسی پاک دامان ایلدی

ایله مبسوط و مفصل بابی عباس علی

بیر عتاب نفسیده یازدی مفصل مجملی

اختیار ایتدی بو منظوره قلم ایکی الی

چون سویا دگمیشدی کسرین بونلا جبران ایلدی

تیر پرانیله دولدوردی وجودین یوز گوزین

اوج اعلای مواساته همای ایتدی اوزین

صفحه ی رخساره گوز قانیله یازدی بو سوزین

گوز سو گورماق دردیمه اوخ یاخشی درمان ایلدی

سو کیمی یوزلرده گورموشدی سوسوزلار اشکینی

اوز گوزوندن آرتیق ایلردی حراست مشکینی

بو مروتلر آپاردی بو حراست رشکینی

شاهپرسیز شاهبازی تیرباران ایلدی

اوخ اوخ اوستن سانجیلوب پر دوردی پر اوسته ز بس

مرغ روحه اوخ الیندن تنگ اولوب اوخلی قفس

مشکل اولدی حضرت عباسه تجدید نفس

سینه سین ظلم اوخلاری ازبسکه شان شان ایلدی

مرحوم ذهنی زاده

منبع مجموعه کانالهای مدح و مرثیه